शिवा संघटनेच्या जिल्हाध्यक्षपदी संजय बताले तर तुळजापूर तालुका अध्यक्षपदी रवी (गोटू) मुळे यांची निवड
शिवा संघटनेच्या धाराशिव जिल्हा कार्यकारिणीची पुनर्रचना
धाराशिव, लक्षवेध दि. २ जून
शिवा अखिल भारतीय वीरशैव युवक संघटनाचे संस्थापक अध्यक्ष प्रा. मनोहर घोंडे यांच्या मार्गदर्शनाखाली धाराशिव जिल्ह्यातील धाराशिव, तुळजापूर, लोहरा व उमरगा तालुक्यातील जुन्या कार्यकारिण्या बरखास्त करून नव्या कार्यकारिणीची घोषणा करण्यात आली.
लोहा (जि. नांदेड) येथील संघटनेच्या कार्यालयात झालेल्या बैठकीत श्री. संजय बताले (नळदुर्ग) यांची धाराशिव जिल्हाध्यक्षपदी निवड करण्यात आली. तसेच श्री.सतीश पाटील (हिप्परगा ता. तुळजापूर) यांची जिल्हा उपाध्यक्षपदी, श्री. रविराज (गोटू) मुळे यांची तुळजापूर तालुका अध्यक्षपदी तर श्री. प्रशांत बोधणे (सावरगावकर) यांची तालुका उपाध्यक्षपदी निवड करण्यात आली.
नवनियुक्त पदाधिकाऱ्यांनी समाजातील युवकांना संघटित करून धाराशिव जिल्ह्यातील शहर, तालुका व गावपातळीवरील संघटनात्मक काम अधिक जोमाने राबविण्याचा संकल्प व्यक्त केला. तसेच मठ-मंदिर, सामाजिक, शैक्षणिक व आर्थिक विकासाशी संबंधित उपक्रमांद्वारे समाजहिताची कामे करण्यावर भर देण्यात येणार असल्याचे सांगितले.
या कार्यक्रमास शिवा संघटनेचे राष्ट्रीय सरचिटणीस उमाकांत शेटे (पुणे), राष्ट्रीय उपाध्यक्ष दत्ता भाऊ चव्हाण (उदगीर), राज्य सरचिटणीस धनकुमार शिवणकर (परभणी) यांच्यासह संघटनेचे अनेक पदाधिकारी व कार्यकर्ते उपस्थित होते.
वीरशैव लिंगायत समाजाची मोठी संख्या असलेल्या धाराशिव जिल्ह्यात समाज संघटित करून विविध प्रश्न सोडविण्यासाठी नव्या कार्यकारिणीची निवड करण्यात आल्याचे मत उपस्थित मान्यवरांनी व्यक्त केले. या निवडीबद्दल समाजातील विविध स्तरांतून नवनियुक्त पदाधिकाऱ्यांचे अभिनंदन करण्यात येत आहे.
